Prezident İlham Əliyevin altıncı çağırış Milli Məclisin iclasındakı iştirakı və tarixi bir çıxış əlamətdar bir hadisə idi. Dünyadakı çağırışları və ölkəmizin prioritetlərini özündə əks etdirən bu nitq həm də Azərbaycan parlamentin və hər bir millət vəkilinin gələcək fəaliyyətini müəyyənləşdirən “yol xəritəsi”dir. Ötən üç il ərzində Milli Məclisin fəaliyyəti də bunu sübut edib.
Bu fikirləri Siyasətinfo-ya açıqlamasında Milli Məclisin deputatı Məlahət İbrahimqızı deyib.
Onun sözlərinə görə, qanunverici hakimiyyət ötən bu dövr ərzində Dövlətimizin həm xarici və həm də daxili siyasətində yaddaqalan və mühüm uğurlara imza atdı. Bildirib ki, üç il öncə dövlət başçısının Parlamentin ilk açılış iclasındakı nitqi nəinki Milli Məclisin deputatları, eləcə də cəmiyyətin bütün üzvləri – ziyalılar, elm xadimləri, dövlət qulluqçuları, vətəndaş cəmiyyətinin nümayəndələri, ümumilikdə, hər kəs üçün mesajdır: “Prezidentin tövsiyələri, vurğuladığı məqamlar qarşıda görəcəyimiz işlərin təməlidir və mən deyərdim ki, hər bir deputatın gündəlik kompasıdır. Ölkə başçısı hər bir deputatı onları seçən xalqın yanında olmağa, işlərində məsuliyyətli və şəffaf fəaliyyət göstərməyə çağırıb. Prezident İlham Əliyevin nitqi deputatların məsuliyyətini birə-beş artırır və onlara stimul verməklə bərabər, həm də daha səmərəli, məhsuldar işləməyə ruhlandırır. Yeni Azərbaycan Partiyasının (YAP) böyük səs çoxluğu ilə qələbə qazanması və altıncı çağırış Milli Məclisin yeni tərkibinin müəyyən edilməsi xalqın Azərbaycan Prezidentinin gördüyü işlərə, onun uzaqgörən siyasətinə, nüfuzuna verdiyi dəyərdir. 2003-cü ildə Azərbaycan Respublikasının Prezidenti seçiləndə dediyi “Mən hər bir azərbaycanlının prezidenti olacağam” ifadəsi bu gün reallığı əks etdirir.
Dövlətimizin başçısı çoxistiqamətli və hərtərəfli nitqində ölkəmizin daxili və xarici siyasəti ilə bağlı fikirlərini səsləndirdi, konturları müəyyən etdi. Prezident İlham Əliyev, həmçinin ölkəmizin ən ağrılı problemi olan Ermənistan-Azərbaycan Dağlıq Qarabağ münaqişəsindən tutmuş, qaçqınların, məcburi köçkünlərin, şəhid ailələrinin, aztəminatlı ailələrin, bir sözlə, həssas təbəqənin problemlərinə toxundu.
Dövlətimizin başçısı, həmçinin Ermənistan-Azərbaycan münaqişəsinin həllinə, 1 milyondan çox qaçqın və məcburi köçkünün problemlərinə ədalətlə yanaşmayan, laqeyd qalan, amma ölkədə qondarma, ikinci və ya üçüncü dərəcəli məsələləri qabardan xarici qüvvələrə də mesaj verdi. Bu gün dünyanın müxtəlif ölkələri miqrant problemindən əziyyət çəkir, Azərbaycanda sabitlik, həmrəylik hökm sürür. Qürurla deməliyik ki, VI çağırışın üç ili ərzində parlament Beynəlxalq aləmdə qurmuş olduğu əlaqələri, həyata keçirdiyi müxtəlif , mötəbər tədbirlərlə diplomatiyamıza özünün əhəmiyyətli töhfələrini verib”.
Komitə sədrinin müavini Prezidentin deputatların qəbul etdikləri qanunların icrasına nəzarət etməyi vurğuladığını bildirib: “Milli Məclisdə keçirilən müxtəlif konfranslar, ictimai dinləmələr seçicilərdə çox böyük razılıq hissi yaradır. Milli Məclisin ilk iclasında çıxış edən Dövlətimizin Başçısının tövsiyəsinə görə, qanunlar qəbul olunarkən iqtisadi inkişafın dərinləşdirilməsi, milli dəyərlərin qorunması, informasiya təhlükəsizliyi, sosial siyasət və gənclər siyasəti nəzərə alınmalıdır. Bundan başqa, Prezident İlham Əliyev parlament-hökumət-vətəndaş üçlüyü arasında münasibətlərin daha səmimi, hesabatlı və məsuliyyətli qurulmasının vacibliyinə diqqət çəkib. Müstəqil Azərbaycan parlamentinin tarixində ilk dəfə olaraq qadın parlament sədrinin seçilməsini əlamətdar hadisələrdən biri kimi qiymətləndirib. Onun sözlərinə görə, hazırda ölkəmizdə qadınların idarəetmə, icra və rəhbər orqanlarda irəli çəkilməsi adi hal alıb. Çünki bunun üçün Azərbaycanda münbit şərait var. Altıncı çağırış Milli Məclisin Sədrinin də qadın olması cəmiyyətimiz, o cümlədən qadınlar tərəfindən yüksək dəyərləndirilir.
Ümumilikdə, parlament seçkiləri demokratik şəraitdə keçdi və xalqımız öz iradəsini sərbəst şəkildə ifadə etdi. Altıncı çağırış Milli Məclisin yeni tərkibinin müəyyən edilməsi də ölkəmizdə aparılan dərin köklü islahatların davamı idi. Düşünürəm ki, Milli Məclis xalqın mənafeyini əks etdirməklə, yeni tərkibdə, yeni spikerlə dövlətçiliyimizin, müstəqilliyimizin qorunması işinə öz layiqli töhfəsini verəcək”.
