![](https://siyasetinfo.az/wp-content/uploads/2024/07/1721486894_d7fb413ec8df2ffffad1525cadc8d318-1024x659.jpg)
II Qarabağ müharibəsindən sonra mədəniyyət paytaxtımız Şuşa yenidən özünün tarixi nüfuzunu bərpa edib. Dövlətimizin həyata keçirdiyi Böyük Qayıdış konsepsiyasına uyğun olaraq bütün işğaldan azad edilmiş ərazilərimizdə erməni vandallığının qalıqları aradan qaldırılır. Tariximizə, mədəniyyətimizə Ermənistanın 30 illik dövründə vurulan zərbələrə baxmayaraq torpaqların əsl sahibləri yenidən buranı cənnətə çevirir. Artıq mədəniyyət paytaxtımız olan Şuşa nəinki yerli, regional həmçinin qlobal tədbirlərin, ictimai-siyasi, mədəni mövzulara həsr edilmiş müzakirələrin vacib bir məkanı kimi xarakterizə edilir.
Bunu Siyasətinfoya Milli Məclisin deputatı Məlahət İbrahimqızı deyib.
O qeyd edib ki, bunu mənada artıq ikinci dəfədir Şuşada baş tutan Qlobal Media Forumu burada müzakirə edilən məsələlər, verilən mesajların əhəmiyyəti baxımından bu gün qlobal miqyasda diqqət mərkəzindədir: “Sözsüz ki, Azərbaycan Prezidenti cənab İlham Əliyevin “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumundakı çıxışı zamanı olduqca vacib mesajlar verib, mühüm məsələlər ətrafında konkret mövzulara toxunub. 50-yə yaxın ölkədən 150-dən çox xarici qonağın, o cümlədən 30-a yaxın ölkənin informasiya agentliyi, 3 beynəlxalq təşkilat və 82 media qurumunun qatıldığı Forum iştirakçılar üçün birgə müzakirə və hərəkət platforması baxımından olduqca böyük önəm kəsb edir. Forum çərçivəsində “Təsirin qiymətləndirilməsi: Dezinformasiyanın əhatə dairəsini müəyyənləşdirmək”, “Dezinformasiyaya qarşı daha davamlı cəmiyyət qurmaq üçün siyasət və təşəbbüslər”, “Süni intellektin reallığa, mediaya və dezinformasiyaya təsiri: Media savadlılığının təşviqi” və “İqlim hərəkatı və media” mövzularında dörd panel sessiya təşkil olunub. Panel sessiyalarda müxtəlif ölkələrdən olan rəsmilər, media və vətəndaş cəmiyyəti, dövlət və biznes nümayəndələri, beynəlxalq təşkilatların təmsilçiləri və media ekspertləri ətraflı fikir və təcrübə mübadiləsi aparıblar. Həmçinin bütün bunlarla yanaşı BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar həyata keçirilən tədbirlər və hazırlıq işləri, ölkə səviyyəsində iqlim dəyişikliyinin təsirləri ilə bağlı aparılan mübarizə, azad edilmiş ərazilərdə bərpa və yenidənqurma prosesində sərgilənən dayanıqlı yanaşma barədə məlumat verilib”.
![](https://siyasetinfo.az/wp-content/uploads/2023/04/Məlahət-Ibrahimqizi.jpg)
Millət vəkili bildirib ki, sual-cavab formatında keçirilən Forumda cənab Prezident İlham Əliyev dünyada və regionda baş evrən siyasi proseslərlə əlaqədar media nümayəndələrinin suallarını əhatəli şəkildə cavablandırıb: “Dövlətimizin başçısı ayrı-ayrı mövzulara aid sualları cavablayarkən bir çox mühüm məsələlərdə ölkəmizin konkret mövqeyini nümayiş etdirib. Azərbaycanla Ermənistan arasında münasibətlərin normallaşması prosesi ilə bağlı ölkə başçısı tərəfindən dövlətimizin mövqeyi bir daha ifadə edilib. Ermənistanın sülh müstəvisində öz üzərinə düşən vəzifələrin icrası ilə bağlı konkret istiqamətlər bildirilib. Prezident İlham Əliyevin Forumda iştirakı yerli və xarici media təmsilçilərinin suallarına tutarlı və məntiqli cavabları ilə ölkəmizin post müharibə dövrü perspektivləri, regionda formalaşmış yeni reallıqlarla bağlı yanaşması açıq şəkildə ifadə olunur. Təbii ki, Azərbaycanla yanaşı Qafqazın, Türk dünyasının siyasi ideoloji, mədəni mərkəzi rolu daha da güclənən tarixi Şuşa şəhərində Qlobal Media Forumunun keçirilməsi xüsusi məna kəsb edir. Forumun Şuşada keçirilməsi Azərbaycan tarixinin, mədəniyyətinin, eləcə də, şanlı zəfərinin və azad edilmiş tarixi torpaqlarımızda ölkəmiz tərəfindən həyata keçirilən genişmiqyaslı bərpa-quruculuq işlərinin təbliği baxımından önəmlidir”.
Məlahət İbrahimqızı vurğulayıb ki, Azərbaycanın enerji sahəsində həyata keçirdiyi uğurlu strategiya da Şuşada keçirilən Qlobal Forumda gündəmdə olub: “Dövlət başçısı Cənub Qaz dəhlizinin uğurla icra edildiyini, Azərbaycanın Avropa üçün əhəmiyyətli qaz tədarükçüsünə çevrildiyini bildirib. Forumda həmçinin mühüm enerji layihələrin Azərbaycanın təşəbbüsü ilə reallaşmasından bəhs edilib. Azərbaycan enerji sahəsində beynəlxalq layihələrin təşəbbüskarı və uğurlu icraçısı kimi qəbul olunur. Bu mənada Avropanın enerji təhlükəsizliyində Azərbaycanın rolu bütün dünya tərəfindən etiraf edilir. Azərbaycan həmçinin yaşıl enerji sahəsində iri layihələrin icraçısı kimi tanınır. Qarabağ və Şərqi Zəngəzurun, Naxçıvanın yaşıl enerji zonasına çevrilməsi istiqamətindən atılan addımlar görülən işlər bu mənada xüsusi önəmə malikdir. Şuşa forumunda həmçinin cənab Prezidentin Böyük Qayıdışla bağlı atılan sistemli addımlardan bəhs edib. Azad edilmiş ərazilərdə bərpa-quruculuq prosesinin icra vəziyyəti keçmiş qaçqın və məcburi köçkünlərin sistemli şəkildə daimi olaraq öz ata-baba yurdlarına köçürülməsindən bəhs olunub”.