![](https://siyasetinfo.az/wp-content/uploads/2024/07/1720097721_446ba601d60782d9e58384ff7d89c9df-1024x694.jpg)
Prezident İlham Əliyevin Şanxay Əməkdaşlıq Təşkilatının Astanada keçirilən Zirvə görüşünə dəvət edilməsi və burada keçirilən yüksək səviyyəyli görüşlər mühüm əhəmiyyət kəsb edir. Dost və tərəfdaş ölkələrin liderləri ilə Azərbaycan Prezidentinin səmimi görüşləri, aparılan vacib müzakirələr, əldə edilən tarixi razılaşmalar xüsusi önəmə malikdir. Bu xüsusda Prezident İlham Əliyevin “ŞƏT plyus” formatında keçirilmiş görüşdə çıxışı, verdiyi vacib mesajlar diqqət mərkəzindədir.
Bunu Siyasətinfoya YAP Təftiş Komissiyasının üzvü, Milli Məclisin VI çağırış deputatı olmuş Məlahət İbrahimqızı deyib.
O qeyd edib ki, ölkəmizə olan yüksək münasibət etibarlı əməkdaşlıq əlaqələrinin göstəricisidir: “Son iki ildə Prezident İlham Əliyev Qazaxıstana dörd dəfə səfər edib. Həmin müddətdə Qazaxıstan Prezidentinin Azərbaycana üç dəfə səfəri baş tutub. Bu amillər ölkələr arasında ikitərəfli münasibətlərin yüksək səviyyədə olduğunu göstərir. Cənab Prezident də çıxışında bu vacib amilləri xüsusilə qeyd edib. Vurğulanıb ki, Azərbaycan ikinci dəfədir ki, ŞƏT-in Zirvə toplantısına dəvət olunur. Bu Azərbaycanla üzv dövlətlər arasında inkişaf edən tərəfdaşlığın göstəricisi hesab edilir. Sözsüz ki, birgə əməkdaşlığın vacib sahələri mövcuddur. Şərq-Qərb və Şimal-Cənub nəqliyyat dəhlizləri üzrə qarşılıqlı fəaliyyət Azərbaycanla ŞƏT-ə üzv dövlətlər arasında əməkdaşlığın vacib sahəsini təşkil edir. Eyni zamanda perspektiv əməkdaşlıq əlaqələri genişlənir. Coğrafi mövqeyi və nəqliyyat infrastrukturuna qoyulmuş böyük sərmayələr Azərbaycana Avrasiyanın nəqliyyat-logistika qovşaqlarından birinə çevrilmək imkanı verib. Məhz bu reallıqda Orta Dəhlizin tərkib hissəsi olan Bakı-Tbilisi-Qars dəmir yolunun illik ötürücülük qabiliyyəti Azərbaycanın sərmayələri hesabına 1 milyon tondan 5 milyon tona qədər artıb. Həmçinin indiki şəraitdə Azərbaycan tərəfdaşları ilə birgə Orta Dəhlizin rəqəmsallaşması üzərində aktiv iş aparır”.
![](https://siyasetinfo.az/wp-content/uploads/2023/04/Məlahət-Ibrahimqizi.jpg)
Təftiş Komissiyasının üzvü hesab edir ki, Azərbaycan, həmçinin Şimal-Cənub nəqliyyat dəhlizinin inkişafında mühüm rol oynayır: “Şimal-Cənub dəhlizinin Azərbaycan seqmentinin dəmir yolu və avtomobil infrastrukturu artıq hazırdır və uğurla fəaliyyət göstərir. Ölkəmizin başçısı sammitdə 2023-cü ilin sentyabrında Azərbaycan beynəlxalq səviyyədə tanınmış əraziləri üzərində suverenliyini tam bərpa etdiyini də diqqətə çatdırıb. Bununla da beynəlxalq hüquq və tarixi ədalətin bərpa olunduğu vurğulanıb. Azərbaycan Ermənistanın otuzillik işğalına son qoymaqla BMT Təhlükəsizlik Şurasının otuz il kağız üzərində qalmış 4 qətnaməsinin icrasını hərbi-siyasi vasitələrlə təmin edib. Hazırda ölkəmiz münaqişə dövrünü arxada qoyaraq sülh təşəbbüslərini daha güclü formada təşviq edir. Azərbaycan həmçinin multilateralizmi fəal şəkildə dəstəkləyir. Ölkəmizin 2019-2023-cü illərdə Qoşulmama Hərəkatına uğurla sədrliyi ilə bağlı açıq bir nümunə mövcuddur. Azərbaycanın QH-a sədrliyi dövrü onun qlobal arenada nüfuzunu və gücünü möhkəmləndirdi, Hərəkatın institusional inkişafına töhfə verdi, üzv dövlətlərin dəstəyi ilə Hərəkatın Parlament Şəbəkəsini, Gənclər Təşkilatını təsis etdi, habelə Qadın Platformasının əsasını qoyuldu”.
Məlahət İbrahimqızı cənab Prezidentin çıxışında təxminən 200 ölkənin yekdil dəstəyi ilə Azərbaycan bu il COP29-a ev sahibliyinə böyük vurğu ilə toxunduğunu söyləyib: “Bakıda keçiriləcək COP29 çərçivəsində inkişaf etmiş və inkişaf etməkdə olan ölkələr arasında körpü yaratmaq üçün Azərbaycan özünün səylərini əsirgəməyəcək. Eyni zamanda inkişaf etməkdə olan ölkələrin legitim maraqlarını nəzərə alacaq razılaşmanın əldə edilməsi üçün təşəbbüslərlə çıxış edəcək. Ölkəmizin başçısı həmçinin çıxışında vurğulayıb ki, Azərbaycan inkişaf etməkdə olan kiçik ada dövlətləri üçün xüsusi texniki yardım fondunun yaradılması təşəbbüsü ilə çıxış edib. Bütün bu amillər Azərbaycanın prioritetləri sırasında duran və regional, qlobal çağırışları özündə ehtiva edən mühüm prinsiplərdir”.