Azərbaycan Dillər Universitetində Ulu Öndər Heydər Əliyevin 100 illiyi münasibətilə Milli Məclisdə keçirilən xüsusi iclasda iştirak etmək üçün gələn Venesuela Respublikasının Milli Assambleyasının deputatları ilə görüş keçirilib.
Görüşdə Millət vəkili, ADU-nun Sosial məsələlər və ictimaiyyətlə əlaqələr üzrə prorektoru Tamam Cəfərova da iştirak etmişdir.
Görüşü açan Azərbaycan Dillər Universitetinin (ADU) rektoru, akademik Kamal Abdulla nümayəndə heyətini rəhbərlik etdiyi ali təhsil ocağında görməkdən məmnun olduğunu bildirib, universitetin geniş beynəlxalq əlaqələrindən danışıb, tədris olunan dillər haqqında məlumat verib. Qeyd olunub ki, ADU-da 20-dən artıq ölkənin dil və mədəniyyət mərkəzi fəaliyyət göstərir. Görüşdə iki ölkə arasında təhsil və elm istiqamətində olan əməkdaşlığa diqqət çəkilib, bu istiqamətdə gələcəkdə addımların atılmasının vacibliyi vurğulanıb.
Venesuela parlamentinin İnzibati və xidmətlər daimi komissiyasının sədri Pedro Karreno səmimi qarşılanmaya görə təşəkkürünü bildirib. Təhsil sahəsinin ölkəsi üçün fundamental sahə olduğunu diqqətə çatdıran Pedro Karreno Azərbaycan Dillər Universiteti ilə Venesuelanın aparıcı universitetlərinin əməkdaşlıqla bağlı saziş imzalamasının müzakirə edildiyini bildirib. Qeyd olunub ki, məhz bu əməkdaşlıq nəticəsində tələbə mübadiləsi, Azərbaycan dilinin tədrisi, ədəbiyyat və mədəniyyət sahəsində qarşılıqlı tərcümə işlərinin aparılması mümkün olacaq.
Venesuelanın Azərbaycandakı səfiri Kristofer Alberto Martinez Berroteran, parlamentin iqtisadiyyat, maliyyə və milli inkişaf üzrə daimi komissiyasının sədri Jesus Foria müxtəlif sahələr üzrə əməkdaşlığın perspektivlərindən danışıblar.
Sonda nümayəndə heyətinin üzvləri ADU-nun tələbələri ilə görüşüb, onların suallarını cavablandırıblar.
