Araz çayı üzərində inşa edilmiş “Xudafərin” hidroqovşağının istismara verilməsi və “Qız Qalası” hidroqovşağının açılışı mühüm əhəmiyyətə malikdir. Prezident İlham Əliyev “Qız Qalası” hidroqovşağının açılışı və “Xudafərin” hidroqovşağının istismara verilməsini tarixi hadisə olduğunu qeyd edib. Ölkəmizin başçısı da bildirib ki, İranın bu layihələri ərsəyə gətirmək üçün geniş imkanları, böyük təcrübəsi var. Bu böyük bilik, səriştə və təcrübə tələb edən irimiqyaslı layihədir. Sözsüz ki, layihələrin reallaşması Azərbaycanla İran arasında olan dostluğun növbəti təzahürüdür.
Bunu Siyasətinfoya Milli Məclisin deputatı Məlahət İbrahimqızı deyib.
O qeyd edib ki, ölkəmizin başçısı da çıxışında əsrlər boyu İran və Azərbaycan xalqlarının bir yerdə yaşayıb-yaratdığını vurğulayıb: “Məhz bunun nəticəsində ölkələr arasında münasibətlər indiki səviyyəyə yüksəlib. Təbii ki, ilk dəfə olaraq İran və Azərbaycan prezidentlərinin sərhəddə görüşü tarixi hadisə kimi hər iki xlaqın yaddaşına həkk olundu. Bu eyni zamanda iki ölkə sərhəddinin dostluq, gələcəyə yönəlmiş əməkdaşlıq körpüsü olduğunu təsdiq edir. Qədim tarixdən gələn qarşılıqlı hörmət, anlaşma, dəstək, əldə edilən nəticələrdə, gələcək planlarda özünü göstərəcək. Azərbaycanla İran beynəlxalq, regional təhlükəsizlik məsələləri ilə bağlı məsələlərdə eyni mövqeni bölüşür. Bölgənin sabitliyi və gələcək təhlükəsizlik tədbirlərinin gücləndirilməsi bunun mühüm amil olduğunu bildirən ölkəmizin başçısı İran-Azərbaycan dostluğunun önəminin əsas amil olduğunu vurğulayıb”.
Deputat bildirib ki, Bakı və Tehran bütün beynəlxalq təşkilatlarda bir-birini dəstəkləyir və bu dəstək bundan sonra da davam edəcək: “Qoşulmama Hərəkatında, İslam Əməkdaşlıq Təşkilatında, ECO-da və BMT-də Azərbaycan və İran bir-birinə dəstək verir. Təbii ki, burada nəqliyyat layihələri xüsusi rol oynayır. Cənab Prezident də vurğulayıb ki, “Bu gün nəinki ölkələrimiz üçün, daha geniş coğrafiya üçün böyük əhəmiyyət daşıyan Şimal-Cənub Nəqliyyat Dəhlizinin yaradılması ilə əlaqədar birgə səylər göstərilib. Bu günə qədər göstərilən səylər artıq real layihələrə çevrilib. Bundan sonra həm İran ərazisində, həm Azərbaycan ərazisində müasir dəmir yolu infrastrukturunun yaradılması və modernləşdirilməsi Şimal-Cənub Nəqliyyat Dəhlizini dünyanın ən önəmli nəqliyyat damarına çevirəcəkdir”. Bu istiqamətdə də Azərbaycan tərəfindən zəruri addımlar atılır. Ağbənd istiqamətində yeni avtomobil körpüsü tikilir. Bu körpü Şimal-Cənub Nəqliyyat Dəhlizinin bir hissəsi olacaq. Həmçinin bu yol Azərbaycan onun ayrılmaz hissəsi olan Naxçıvanla birləşməsi ilə yanaşı beynəlxalq nəqliyyat dəhlizinin bir parçasıdır. Yol eyni zamanda Şimal-Cənub, Şərq-Qərb Nəqliyyat dəhlizlərinin bir hissəsi kimi çıxış edəcək”.
Millət vəkili ölkə başçısı tərəfindən azad edilmiş Qarabağ və Şərqi Zəngəzur bölgələri, eləcə də Naxçıvan bölgəsinin Azərbaycanda “yaşıl enerji” zonaları elan edildiyini söyləyib: “Bu xüsusda İranla Azərbaycan arasında elektrik, qarşılıqlı təchizat sahələrində geniş perspektivlər var. İki ölkə arasında ticarət dövriyyəsinin artırılması, yeni birgə müəssisələrin yaradılması qarşıda böyük hədəflərin olduğunu göstərir. Ölkəmizin başçısı açılış mərasimində Azərbaycanın beynəlxalq birlik tərəfindən tanınmış ərazilərinin 30 ilə yaxın Ermənistanın işğalı altında qalması və bunun fonunda beynəlxalq birliyin, xüsusən də ATƏT-in Minsk qrupu və onun həmsədrlərinin fəallətsiz qalmasına diqqət çəkib. Qeyd edilib ki, onların məqsədi məsələni həll etmək yox, dondurmaq olub. Cənab Prezident haqlı olaraq bir daha qeyd edib ki, 28 il ərzində fəaliyyət göstərən, əslində, fəaliyyətsiz olan Minsk qrupunun tamamilə ləğv edilməsi Azərbaycanın haqlı tələbidir”.
Məlahət İbrahimqızı Azərbaycan özünün beynəlxalq birlik tərəfindən tanınan, qəbul edilən ərazi bütövlüyünü hərbi siyasi yolla təmin etdiyini bildirib: “2020-ci ilin 44 günlük Vətən Müharibəsi və 2023-cü ilin bir günlük lokal antiterror tədbirləri nəticəsində Azərbaycan özünün dünya birliyi tərəfindən tanınan, qəbul edilən ərazi bütövlüyünü və suverenliyinmi tam təmin edib. Hazırda bölgədə sülh istiqamətində çağırışlar həyata keçirilir ki, bunun da aparıcı aktoru məhz Azərbaycandır. Azərbaycanın təklifi əsasında Ermənistanla sülh müstəvisində addımlar atılır. Sərhədlərin dəqiqləşdirilməsi ilə bağlı atılan son addımlar bunun bariz nümunəsidir. Azərbaycan sülh prosesinə sona qədər sadiqdir. Sadəcə olaraq kənar qüvvələr və ölkələr prosesə mümkün qədər müdaxilə etməməlidir. Ölkəmizin başçısı da bir daha bəyan etdi ki, bölgənin problemləri məhz bölgə dövlətlərinin iştirakı və iradəsi ilə öz həllini tapa bilər. Bakının əsas hədəfi ondan ibarətdir ki, regionda qalıcı sülh və təhlükəsizlik fonunda sıx əməkdaşlıq, inkişaf və tərəqqi olsun”.
