Müasir beynəlxalq münasibətlər sistemində Azərbaycan Respublikasının xarici siyasəti Prezident cənab İlham Əliyevin rəhbərliyi ilə milli maraqlara əsaslanan və uzunmüddətli strateji hədəflərə xidmət edən bir model kimi formalaşmışdır. Bu modelin əsas istiqamətlərindən biri türk dövlətləri ilə münasibətlərin inkişaf etdirilməsi və mövcud əlaqələrin yeni keyfiyyət mərhələsinə yüksəldilməsidir. Azərbaycan üçün türk dünyası ilə əməkdaşlıq təkcə tarixi yaxınlıq deyil, həm də siyasi, iqtisadi və geostrateji zərurətdir.
Prezident İlham Əliyevin həyata keçirdiyi siyasət nəticəsində Azərbaycan türk dövlətləri arasında etibarlı tərəfdaş, sabitlik yaradan və təşəbbüslərlə çıxış edən ölkə kimi qəbul olunur. Dövlət başçısının çıxışlarında və beynəlxalq platformalarda səsləndirdiyi mövqelər türk dünyasının vahid maraqlarının qorunmasına və ortaq mövqenin formalaşmasına xidmət edir. Bu yanaşma qarşılıqlı etimadın möhkəmlənməsinə və əməkdaşlığın davamlı xarakter almasına imkan yaradır.
Türk Dövlətləri Təşkilatının fəaliyyətinin genişlənməsi bu siyasətin praktik nəticələrindən biridir. Azərbaycan bu təşkilat çərçivəsində yalnız iştirakçı deyil, eyni zamanda fəal təşəbbüskar rolunda çıxış edir. Qəbul edilən qərarlar və reallaşdırılan layihələr türk dövlətləri arasında siyasi koordinasiyanı gücləndirməklə yanaşı, iqtisadi və nəqliyyat əlaqələrinin inkişafına da təkan verir.
Vətən müharibəsi dövründə və sonrakı mərhələdə türk dövlətlərinin Azərbaycana göstərdiyi həmrəylik bu birliyin real məzmun daşıdığını açıq şəkildə nümayiş etdirdi. Xüsusilə Azərbaycan və Türkiyə arasında münasibətlərin müttəfiqlik səviyyəsinə yüksəldilməsi regional təhlükəsizlik və əməkdaşlıq baxımından mühüm siyasi hadisə kimi qiymətləndirilir. Bu münasibətlər bütövlükdə türk dünyasında inteqrasiyanın dərinləşməsinə güclü stimul verdi.
Azərbaycanın Orta Asiya türk dövlətləri ilə əlaqələri də ardıcıl şəkildə genişlənir. Ticarət, nəqliyyat və enerji sahələrində birgə təşəbbüslər regionun iqtisadi potensialının reallaşdırılmasına xidmət edir. Azərbaycanın mühüm nəqliyyat qovşağına çevrilməsi türk dövlətləri arasında əlaqələrin daha da intensivləşməsinə şərait yaradır.Bununla yanaşı, mədəni və humanitar sahədə əməkdaşlıq da diqqət mərkəzində saxlanılır. Ortaq dəyərlərin təbliği, mədəni irsin qorunması və gənclər arasında əlaqələrin gücləndirilməsi türk dünyasında mənəvi birliyin möhkəmlənməsinə xidmət edir. Beləliklə, türk dövlətləri ilə münasibətlərin inkişafı Azərbaycan Respublikasının xarici siyasətində strateji xətt kimi formalaşmışdır. Prezident İlham Əliyevin rəhbərliyi ilə bu siyasət ölkəmizin beynəlxalq mövqelərinin güclənməsinə və türk dünyasının daha sıx əməkdaşlıq platformasına çevrilməsinə mühüm töhfə verir.
Ülvi Salmanov
YAP Abşeron rayon təşkilatının sədr müavini
