Prezident İlham Əliyevin regionlara hər bir səfəri mühüm əlamətdar hadisələrlə yadda qalır. Dövlətimizin başçısının səfərləri yeni iş yerlərinin, sosial infrastrukturun, istehsal müəssisələrinin və digər obyektlərin açılışı, yeni infrastruktur layihələrinin əsasının qoyulması ilə müşahidə olunur. Sözsüz ki, bu gün Azərbaycanın hər bir bölgəsində genişmiqyaslı bərpa-quruculuq və inkişaf strategiyasına uyğun olan proqramlar ardıcıl şəkildə icra olunmaqdadır.
Bu sözləri Kəlbəcər rayon Ağsaqqallar Şurasının sədri, Yeni Azərbaycan Partiyasının (YAP) təmsilçisi Aqil Məmmədov deyib.
O qeyd edib ki, cənab Prezidentin Sabirabad, İmişli, Cəbrayıl və Zəngilan rayonlarına növbəti səfəri də əlamətdar hadisələrlə yaddaşlarımıza həkk olundu: “Quruculuq-abadlıq, sahibkarlığın dəstəklənməsi və sənaye müəssisələrinə investisiyaların yatırılması baxımından təşəbbüslər ölkəmizdə hər zaman təşviq edilib. Dövlətimizin başçısının da Sabirabada səfəri burada sahibkarlığın və aqrobiznesin inkişaf etdirilməsi, sosial-iqtisadi inkişafı hədəfləyən addımların təşviqi baxımından əhəmiyyətli idi. Sənaye məhəlləsinin yaradılması regionda emal sənayesinin inkişafı baxımından sözsüz ki, önəmlidir. Daxili tələbatı ödəməklə yanaşı, ixracı təşviq edən addımların atılması yeni iş yerlərinin və sosial layihələrin də icrasına da təkan verəcək. Eyni zamanda cənab Prezidentin İmişli rayonunda analoji layihələrə tanışlığı bu mənada əhəmiyyətli oldu. Həmçinin cənab Prezidentin Cəbrayıl rayonuna səfəri və burada yenidənqurma və bərpa işləri ilə yerində tanışlıq, yeni yaşayış məntəqələrinin əsasının qoyulması, artıq öz doğma yurdlarına qayıdan sakinlərlə görüşü qürurverici idi”.
YAP təmsilçisi bildirib ki, bu gün Böyük Qayıdış proqramına uyğun olaraq Qarabağ və Şərqi Zəngəzurda zəruri infrastruktur yaradılır: “Qısa zamanda bu bölgələrdə ən müasir standartlara cavab verən körpülər, tunellər elektrik stansiyaları, müasir standartalara cavab verən yollar tikilib. Həmçinin az müddətdə bu bölgədə 3 beynəlxalq aeroportun açılışı edilib. Bütün bu işləri isə Azərbaycan dövləti öz imkanları hesabına həyata keçirir. Ölkəmizin başçısının liderliyi ilə Qarabağ və Şərqi Zəngəzur cənnətməkana çevrilir. Artıq Şuşa, Laçın, Xankəndidə keçirilən mötəbər tədbirlər bunu təsdiq edir”.
Aqil Məmmədov vurğulayıb ki, Böyük Qayıdış konsepsiyasına uyğun olaraq azad edilmiş ərazilərimizdə görülən işlər Azərbaycan dövlətinin inkişaf strategiyasının mahiyyətini ehtiva edir: “Bu baxımdan da Prezident İlham Əliyevin Sabirabad, İmişli, Cəbrayıl və Zəngilan rayonlarına səfərləri strateji əhəmiyyətə malikdir. Prezident İlham Əliyevin ölkə regionlarına, xüsusilə də işğaldan azad edilmiş ərazilərə mütəmadi səfərləri son illərin ictimai-siyasi həyatında mühüm hadisələrdən biridir. Hər bir səfər təkcə yeni infrastruktur və istehsal obyektlərinin açılışı ilə deyil, həm də Azərbaycanın milli inkişaf modelinin və dövlət siyasətinin konkret təzahürü kimi diqqət çəkir.
Dövlətin regionlara iqtisadi dinamika qazandırmaq, yerli sahibkarları dəstəkləmək və regionlararası tarazlı inkişafı təmin etmək siyasətinin mahiyyəti bu mənada özünün bir daha təsdiq edir. Böyük Qayıdış və yenidənqurma strategiyasına uyğun olaraq işğaldan azad edilmiş Cəbrayıl və Zəngilan rayonlarında ən müasir infrastruktur qurulur. Yeni yaşayış məntəqələrinin, yolların, elektrik stansiyalarının, körpülərin və hava limanlarının tikintisi Azərbaycan dövlətinin bu torpaqlara yalnız simvolik deyil, həm də strateji və sosial-iqtisadi baxımdan dönüş gətirmək niyyətini nümayiş etdirir. Təbii ki, Şuşa, Laçın, Xankəndi kimi şəhərlərdə keçirilən beynəlxalq tədbirlər, konfranslar və mədəni layihələr bu ərazilərin yeni dövrdə regional mərkəzlərə çevrildiyini göstərir. Bu, həm də Azərbaycanın geosiyasi mövqeyinin möhkəmlənməsinə, regionda sabitlik və inkişaf modelinin formalaşmasına xidmət edir”.
